Hytaýly barlagçylar ýylanyň täze görnüşini – Guansi gamyş ýylanyny tapdylar. Bu ýylan ýyrtyjylardan goranmak üçin guýrugynyň kömegi bilen ikinji kelläniň şekilini döretmäge ukyplydyr.
Täze açyş «Zoosystematics and Evolution» žurnalynda çap edildi. Gözleg işleri Günorta Hytaýyň Guansi-Çžuany awtonom raýonyndaky «Huapin» milli tebigy goraghanasynyň biodürlüligini öwrenmek taslamasynyň bir bölegi boldy. Işlere Guansi tebigat taryhy muzeýiniň hünärmenleri gatnaşdylar.
Ýylanyň uzynlygy 20 santimetrden biraz gowrak. Onuň inçe goňur göwresi bolup, arkasynyň dowamynda ýedi sany garamtyl we üzük-kesik zolagy bar. Göwresindäki teňňeleriň gyrasynda bolsa tor şekilli nagşy emele getirýän goýy reňkli tegmiller ýerleşýär.
Barlagçylaryň maglumatyna görä, bu görnüş esasan gijelerine işjeň bolup, ýarym ýerasty durmuş ýörelgesini alyp barýar. Olar 760 metr belentlikdäki ýasy ýaprakly tokaýlarda, ýapraklaryň aşagynda, toprakda we gaýa jaýryklarynda bukulyp ýaşaýarlar.
Onuň esasy iýmitini ýer gurçuklary we mör-möjekleriň ýumşak göwreli liçinkalary düzýär.
Howp abanan wagty ýylan göwresini «sekizlik» (8) şekiline getirýär ýa-da togalak guýrugyny ýokary galdyryp, ikinji kelläniň şekilini döredýär. Alymlar bu görnüşiň zäherli däldigini we hiç hili agressiwlik görkezmeýändigini belleýärler.
Bu açyş «Huapin» goraghanasynda 2026-njy ýylda edilen ikinji uly täzelikdir. Mundan ozal ol ýerde «Leptobrachella cathaya» atly gurbaga görnüşi hem tapylypdy.
