Pakistanda we Hindistanda howanyň temperaturasy +46°C-ä çenli ýetýän we uzak wagtlap dowam edýän aşa yssylyk hasaba alynýar diýip, Zakon.kz neşiri ýazýar.
Şeýle agyr şertler energiýa ulgamlaryna aşa agram salýar, elektrik energiýasynyň kesilmegine we suw gahatçylygyna sebäp bolýar. Netijede millionlarça adamyň gündelik durmuş tertibi üýtgeýär we gündizlerine köçä çykmagyny çäklendirýär.
Pakistanyň günortasynda, esasan hem Sind welaýatynda howanyň gyzgynlygy yzygiderli +44°C we +46°C-den ýokary geçdi. Karaçi şäherinde iň ýokary görkeziji +44,1°C-ä ýetip, bu 2018-nji ýylyň maý aýyndan bäri rekord derejedir. Klimatologlar gijelerine-de howanyň gyzgyn bolmagynyň we çyglylygyň ýokarlanmagynyň ýaşaýjylara örän agram salýandygyny belleýärler. Soňky ýyllar bu sebitde ortaça temperatura 1,4°C, Sindde bolsa 1,7°C ýokarlandy, munuň netijesinde tomus pasly has uzalyp, geçmesi kyn bolup başlady.
Meňzeş ýagdaý Hindistanyň Radžastan, Gudžarat, Maharashtra ştatlarynda we birnäçe demirgazyk sebitlerinde hem ýüze çykýar, ol ýerlerde gyzgynlyk +45°C-den geçdi. Häkimiýetler ilat üçin ýörite duýduruşlary çap edýärler.
Seljerijileriň pikiriçe, bu aşa yssylyk uzak möhletli howa üýtgemeleri we şäherleşme sebäpli ýüze çykýar. «World Weather Attribution» guramasynyň maglumatlaryna görä, ynsan täsiri esasynda dörän şeýle ýagdaýlar yssy howa tolkunlarynyň ýüze çykmak ähtimallygyny üç esse artdyrdy.
Hünärmenler täze howa şertlerine uýgunlaşmak üçin gyssagly çäreleri görmäge – salkynladyjy merkezleri döretmäge, suw elýeterliligini giňeltmäge, lukmançylyk taýdan taýýarlylygy ýokarlandyrmaga we şäherleri bagy-bossanlyga öwürmäge çagyrýarlar.
