13-nji maýda agşamara Hindistanyň demirgazygyndaky Uttar-Pradeş ştatynda örän güýçli harasat turdy. Tebigy apatyň netijesinde azyndan 111 adam pida boldy we 72 adam dürli şikesleri aldy. Harasat güýçli ýagyş, gar we ýyldyrym çakmalary bilen utgaşdy diýip, Indian Express gazeti habar berýär.
Tupan ştatyň bäş etrabyna täsir etdi. Aragatnaşyk ulgamlaryna zeper ýetmegi sebäpli öýjükli aragatnaşyk kesildi, bu bolsa halas ediş işlerini geçirmegi we zyýany anyklamagy kynlaşdyrdy.
Pidalaryň köpüsi agaçlaryň ýykylmagy we binalaryň diwarlarynyň çökmegi netijesinde heläk boldular. Iň agyr ýagdaý Bhadohi etrabynda hasaba alyndy.
Hatda wideoşekillerde güýçli şemalyň bir adamy takmynan 50 metr beýiklige galdyrandygyny-da görmek bolýar. Ol halas bolmak üçin demir saraýa ýapyşypdyr. Emma güýçli şemal saraýy-da uçuryp, adamy hem ýokary göteripdir. Herniçik-de ol adama, dürli şikeslere duçar bolan hem bolsa, diri galmak başardypdyr.
Polisiýa we betbagtçylykly hadysalaryň netijelerini aradan aýyrmak boýunça gulluklar ýykylan agaçlary we harabalary ýygnamak işlerinde benzobyçgylary we göterijileri ulandylar. Häkimiýetler ýerli resmilere heläkçilik bolan ýerlere baryp, kömek işlerini bir gije-gündiziň dowamynda tamamlamagy tabşyrdylar. Zyýan çekenlere öwez tölegleriniň beriljekdigi wada berildi.
Uttar-Pradeş Hindistanyň musson ýagyşlaryna we tupanlaryna iň köp sezewar bolýan sebitleriniň biri hasaplanylýar. Emma maý aýynyň ortalarynda beýle güýçli gar-ýagynyň ýagmagy bu döwür üçin mahsus bolmadyk hadysadyr. Adatça, ýylyň bu wagty sebitde tomus yssysynyň iň ýokary derejesi bolýar, musson pasly bolsa diňe birnäçe hepdeden soň başlanýar diýip, Reuters habar berýär.
