2026-njy ýylyň dünýä çempionatynda Portugaliýa we Kolumbiýa ýygyndylarynyň arasyndaky duşuşygyň petekleriniň bahasy «Superboulyň» nyrhlaryndan hem geçdi. Bu Olaryň şeýle uly gyzyklanmasynyň sebäbi, bu oýnuň Kriştianu Ronaldunyň milli ýygyndy üçin iň soňky çykyşy bolup biljekdigi bilen baglydyr.
Duşuşyk 27-nji iýunda Maýamidäki «Hard Rock Stadium» stadionynda geçiriler. The New York Times neşiriniň «TicketData» maglumatlaryna esaslanyp ýazmagyna görä, bije çekişligiň netijeleri yglan edileninden soň, iň arzan petekleriň bahasy bir sagatdan hem az wagtyň içinde 400 dollardan 2 müň dollara çenli gymmatlady.
Häzirki wagtda alyp-satarlaryň bazarynda iň arzan petegiň bahasy takmynan 2500 dollara deňdir. Geçen ýylky «Superboul» oýunlaryna petekleriň ortaça bahasy 2109 dollar bolupdy.
Portugaliýa – Kolumbiýa duşuşygy eýýäm turniriň toparça tapgyryndaky iň gymmat oýun hökmünde hasaba alyndy. Bahalar boýunça ol diňe dünýä çempionatynyň finalyndan yza galýar (final petekleriniň bahasy 8400 dollardan başlanýar).
Portugaliýanyň ýygyndysy toparça tapgyrynda Kongo Demokratik Respublikasy we Özbegistan bilen hem bäsleşer. Eger komanda pleý-off tapgyryna çykyp bilmese, Kolumbiýa bilen boljak oýun Ronaldunyň milli ýygyndydaky iň soňky duşuşygy bolar.
Bu oýna bolan islegiň ýokarylygynyň ýene bir sebäbi, iki toparyň hem FIFA-nyň reýtinginde ilkinji 15-lige girmegidir. Şeýle hem, Floridada örän uly kolumbiýaly diasporasynyň ýaşamagy duşuşygyň ähmiýetini has-da artdyrýar.
