Hytaý ABŞ-nyň Prezidenti Donald Tramp bilen Hytaý Halk Respublikasynyň Başlygy Si Szinpiniň arasynda geçirilen gepleşikleriň netijesinde 200 sany Boeing uçaryny satyn almaga razy boldy. Bu barada Tramp «Fox News» telekanalynyň ýaýlymynda habar berdi.
«Şu gün ol [Si Szinpin] bir zada — 200 sany uçary sargyt etmäge razy boldy. Bu örän çynlakaý çözgüt, 200 sany uly uçar. Bu köp sanly iş orunlaryny aňladýar» – diýip, Tramp belledi. Onuň aýtmagyna görä, Boeing, takmynan, 150 sany uçar satmagy meýilleşdiripdi.
«Fox News» neşiriniň bellemege görä, Boeing on ýyla golaý wagt bäri Hytaýdan iri sargytlary kabul etmändi. Bu döwürde Pekin Ýewropanyň «Airbus» kompaniýasynyň uçarlaryny işjeň satyn alypdy.
Muňa garamazdan, analitikler Trampyň Hytaýa bolan saparynyň netijesinde has uly şertnama garaşypdy. Reuters agentliginiň maglumatyna görä, Jefferies maýa goýum kompaniýasy 500 uçaryň sargyt edilmegini çaklapdy.
Şertnama baradaky habarlaryň fonunda, 14-nji maýda geçirilen söwdalarda Boeing kompaniýasynyň paýnamalary 4,1 göterim aşak düşdi.
Boeing kompaniýasynyň prezidenti Kelli Ortberg birnäçe amerikan işewürleri bilen bilelikde Trampyň Hytaýa amala aşyran saparyna goşuldy. Wekiliýetiň düzümine Tesla we SpaceX kompaniýalarynyň ýolbaşçysy Ilon Mask, Apple kompaniýasynyň baş direktory Tim Kuk, Nvidia kompaniýasynyň baş direktory Jensen Huang, şeýle hem Meta, BlackRock, Goldman Sachs, Visa we beýleki kompaniýalaryň ýolbaşçylary hem girdi.
«Olar şu gün size we Hytaýa bolan hormatyny bildirmek üçin şu ýerde. Olar üstünlikli işewürlik gatnaşyklaryna umyt bildirýär we biz hem öz tarapymyzdan muny goldaýarys» – diýip, Tramp HHR-iň Başlygy Si bilen duşuşygynyň öňüsyrasynda aýtdy.
