Et dünýäde iň esasy belok çeşmeleriniň biri bolmagynda galýar, ýöne dürli ýurtlaryň oňa bolan islegi dürlüçedir – oňa ýaşaýyş derejesi, medeni däpler we ýerli oba hojalyk aýratynlyklary täsir edýär.
BMG-niň Azyk we oba hojalygy guramasynyň (FAO) maglumatlary haýsy ýurtlarda adam başyna etiň has köp sarp edilýändigini görkezdi.
Sygyr eti barada aýdylanda, sanawda öňdebaryjy Argentina bolup, bu ýerde adam başyna ýylda ortaça 46 kg düşýär. Onuň yzyndan Zimbabwe (44,4 kg), ABŞ (38), Ysraýyl (36,1) we Braziliýa (34,6) gelýär. Argentinada bu asado – milli medeniýetiň bir bölegi bolan barbekýu bilen baglanyşyklydyr.
Zimbabweniň ýokary görkezijileri ýurdy Afrika döwletleriniň köpüsinden aýratynlandyrýar.
Doňuz etini sarp etmek boýunça öňdebaryjylar Horwatiýa (adam başyna 57,4 kg), Ispaniýa (56,5), Çernogoriýa (53,5), Gonkong (52,6) we Polşa (51,6) boldy. Horwatiýada we Ispaniýada doňuz eti ýerli aşhanada möhüm orun eýeleýär. Çernogoriýa we Gonkong hem doňuz etiniň gündelik tagamlarda giňden ulanylmagy netijesinde ýokary görkezijileri berýär.
Towuk etini sarp etmek boýunça Sent-Winsent we Grenadinalar (94,1 kg), Tonga (90,6), Marşall adalary (74,8), Samoa (74,8) we Ysraýyl (70,8) öňdebaryjydyr. Lider ýurtlaryň aglabasy ada döwletleri bolup, bu ýerde towuk belogyň elýeterli çeşmesi we ýer baýlyklarynyň çäkli şertlerinde öndürmek üçin amatlydyr.
Goýun we geçi eti bolsa Mongoliýada has köp sarp edilýär – adam başyna 68,5 kg. Onuň yzyndan Bahreýn (23,4 kg), Täze Kaledoniýa (21,9), Türkmenistan (20,3) we Çad (19) gelýär. Mongoliýanyň öňdebaryjylygy onuň çarwa maldarçylyk medeniýeti bilen baglanyşyklydyr: howanyň aýazly we topragyň garyp şertlerinde et rasionyň esasy bolmagynda galýar. Türkmenistanda goýun eti milli aşhananyň möhüm bölegidir.
