25-nji iýunda Türkmenistanyň Daşary işler ministrliginde daşary işler ministrleriniň orunbasarlarynyň derejesinde türkmen-ukrain syýasy geňeşmeleri geçirildi. Bu barada ministrligiň metbugat gullugy habar berýär.
Türkmenistanyň wekiliýetine daşary işler ministriniň orunbasary Ahmet Gurbanow, Ukraina tarapyna bolsa şol ýurduň daşary işler ministriniň orunbasary Oleksandr Mişenko ýolbaşçylyk etdi.
Geňeşmeleriň barşynda taraplar syýasy-diplomatik, söwda-ykdysady we medeni-ynsanperwer ugurlardaky hyzmatdaşlygyň häzirki ýagdaýyny hem-de geljegini ara alyp maslahatlaşdy. Şertnamalaýyn-hukuk binýadyny pugtalandyrmaga we daşary syýasat edaralarynyň arasyndaky özara gatnaşyklary giňeltmäge aýratyn üns berildi.
Şeýle-de, gatnaşyjylar halkara gün tertibiniň wajyp meseleleri boýunça pikir alyşdy we halkara guramalarynyň, ilkinji nobatda, BMG-niň çäklerindäki hyzmatdaşlygy dowam etdirmegiň möhümdigini belledi.
Syýasy geňeşmeleriň netijeleri boýunça taraplar özara bähbitli ugurlar boýunça türkmen-ukrain hyzmatdaşlygyny mundan beýläk-de ösdürmäge ygrarlydyklaryny tassyklady.
