Türkiýäniň futbol federasiýasy (TFF) bikanun pul goýumlaryna gatnaşmakda güman edilmegi sebäpli 1024 oýunçynyň, şol sanda Superliganyň 27 futbolçysynyň wagtlaýyn futboldan çetleşdirilendigini habar berdi diýip, Anadolu agentligi belleýär.
Üçünji we dördünji diwizionlardaky ýaryşlar iki hepdelik togtadyldy. Agentligiň maglumatlaryna görä, bu ligalarda, degişlilikde, 282 we 629 oýunçy derňew astyna düşdi.
Klublaryň düzüm ýitgileriniň öwezini dolmagy üçin, TFF içerki transferler üçin goşmaça 15 günlük transfer penjiresini açmak haýyşy bilen FIFA-a ýüz tutmak isleýär.
Duşenbe güni derňewiň çäklerinde sekiz adam, şol sanda Superliga klublarynyň biriniň ýolbaşçysy tutuldy – Anadolu agentliginiň habar bermegine görä, bu Stambulyň “Eýupspor” klubundan Murat Ozkaýa.
Ýokary diwizionyň klublary bu waka dürlüçe seslendi. “Beşiktaş” öz oýunçylarynyň – derwezeban Ersin Destanoglunyň we ýarymgoragçy Nejip Uýsalyň arkasyny tutup, olara ynanýandygyny aýtdy. Şol bir wagtyň özünde, “Fatih Karagümrük” federasiýanyň kararyny goldady.
Ozal TFF-iň derňewi professional ligalardaky häzirki 571 eminden 371-isiniň bukmeker platformalarynda akkauntlarynyň bardygyny, 152-siniň bolsa işjeň pul goýandygyny ýüze çykardy.
