24-nji fewralda Prezident Serdar Berdimuhamedow ýurdumyzyň oba hojalyk toplumynda we welaýatlarynda alnyp barylýan işler bilen baglanyşykly iş maslahatyny geçirdi. Oňa wise-premýer T.Atahallyýew hem-de welaýatlaryň häkimleri gatnaşdy. Bu barada “Watan” habarlar gepleşiginde habar berilýär.
Maslahatyň barşynda welaýat häkimleri we wise-premýer T.Atahallyýew ýurdumyzyň oba hojalygynda dowam edýän möwsümleýin işler barada hasabat berdiler.
Bellenilişi ýaly, ýurdumyzda şu ýyl bugdaýyň bol hasylyny ösdürip ýetişdirmek hem-de galla önümleriniň bolçulygyny döretmek maksady bilen, welaýatlaryň bugdaý ekilen meýdanlarynda agrotehnikanyň talaplaryny berjaý etmek arkaly ideg işleri ýerine ýetirilýär.
Bu işler bilen bir hatarda, welaýatlaryň gowaça ekiljek meýdanlarynda tekizleýiş, geriş we çil çekmek, ýuwuş suwuny tutmak işleri alnyp barylýar.
Şeýle hem gowaça ekişine guramaçylykly girişmek maksady bilen, pagta arassalaýjy kärhanalarda tohumlyk gowaça çigitlerini taýýarlamak hem-de olary ekiş möwsümine çenli talabalaýyk saklamak boýunça zerur çäreler görülýär.
Prezident Serdar Berdimuhamedow hasabaty diňläp, oba hojalyk işlerini agrotehnikanyň kadalaryna laýyklykda alyp barmagyň ekinlerden ýokary hasyl almak bilen birlikde, ýer we suw ýaly tebigy serişdelerden netijeli peýdalanmaga hem ýardam berýändigini belledi we bu ugurda alnyp barylýan işleri gözegçilikde saklamagy wise-premýere tabşyrdy.
Soňra döwlet Baştutany iş maslahatyna gatnaşyjylara ýüzlenip, gowaça ekişine taýýarlyk işlerine ünsi çekdi we şunuň bilen baglylykda, welaýatlaryň gowaça ekiljek meýdanlarynda tekizleýiş, çil we geriş çekmek, ýuwuş suwuny tutmak işleriniň geçirilişini berk gözegçilikde saklamagy, ekiş möwsümine çenli pagta öndürijileri ýokary hilli gowaça tohumlary bilen üpjün etmek boýunça ähli zerur çäreleri görmegi tabşyrdy.
