4-nji ýanwarda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Ministrler Kabinetiniň Başlygynyň käbir orunbasarlarynyň, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň baş direktorynyň hem-de beýleki ýolbaşçylaryň birnäçesiniň gatnaşmagynda iş maslahatyny geçirdi.
Birleşen Arap Emirlikleri bilen ýangyç-energetika ulgamynda hyzmatdaşlygy ösdürmek iş maslahatynyň gün tertibiniň esasy meseleleriniň biri boldy.
Türkmen halkynyň Milli Lideri, Türkmenistanyň Halk Maslahatynyň Başlygy ýangyç-energetika toplumynyň ýolbaşçylaryna ýüzlenip, ýurdumyzyň BAE bilen ozaldan bäri ysnyşykly, özara bähbitli hyzmatdaşlyk edýändigini belledi.
Şunuň bilen baglylykda, Abu-Dabiniň milli nebit kompaniýasy (ADNOC) hem-de ştab kwartirasy Dubaýda ýerleşýän «Dragon oil» kompaniýasy bilen ýola goýlan netijeli hyzmatdaşlygy işjeňleşdirmegiň zerurdygyna üns berildi.
Gurbanguly Berdimuhamedow däp bolan gatnaşyklary has ýokary derejä çykarmak üçin täze ylalaşyklary gazanmagyň, şeýle hem Türkmenistanyň iri «Galkynyş» gaz känini özleşdirmek meselesiniň içgin öwrenilmeginiň zerurdygyny belläp, ýangyç-energetika toplumynyň ýolbaşçylaryna birnäçe anyk tabşyryklary berdi.
Maslahatyň dowamynda şeýle hem ulag ulgamynda hyzmatdaşlygy işjeňleşdirmek hem-de “Gündogar-Günbatar” we “Demirgazyk-Günorta” ugurlarynyň çatrygynda ýerleşýän Türkmenistanyň ulag-üstaşyr kuwwatyndan netijeli peýdalanmak meselelerine garaldy.
Beýik Ýüpek ýolunyň ugrunda ýerleşýän ýurdumyz ulag ulgamynyň ähli ugurlary bilen bir hatarda howa ýollaryny yzygiderli ösdürýär. «Türkmenhowaýollary» agentliginiň we «Dubaý awiasiýa korporasiýasy» kompaniýasynyň (Fly Dubai) arasynda hyzmatdaşlyk edilmegi netijesinde Aşgabat – Dubaý - Aşgabat gatnawynyň ugry boýunça gatnawlar ýola goýuldy. 5-nji ýanwarda bolsa, Aşgabat – Abu-Dabi – Aşgabat gatnawy boýunça ilkinji ýolagçy uçarynyň uçuşy amala aşyrylar.
Türkmen halkynyň Milli Lideri bu ugurda durmuşa geçirilýän çäreleri güýçlendirmegiň zerurdygyny ünsi çekip, degişli işleri geçirmegi, ozal gazanylan ylalaşyklaryň üstüniň täze çözgütler bilen ýetirilmelidigi hem-de sanly tehnologiýalary işjeň ornaşdyrmagy tabşyrdy.
