6-njy martda Prezident Serdar Berdimuhamedow ýurdumyzyň welaýatlarynda alnyp barylýan möwsümleýin oba hojalyk işleri boýunça welaýat häkimleri bilen iş maslahatyny geçirdi. Maslahata şeýle hem obasenagat toplumyna gözegçilik edýän wise-premýer A.Ýazmyradow hem gatnaşdy.
Maslahatyň dowamynda häkimler häzirki wagtda welaýatlarda alnyp barylýan möwsümleýin oba hojalyk işleriniň barşy barada hasabat berdiler.
Serdar Berdimuhamdow hasabatlary diňläp, işleriň ýerine ýetirilişine toplumlaýyn çemeleşmegiň möhümdigini aýtdy we häkimlere welaýatlaryň bugdaý ekilen meýdanlarynda alnyp barylýan ideg işleriniň ýokary hilli, öz wagtynda geçirilmeginiň gözegçilikde saklanylmagyny tabşyrdy.
Wise-premýer A.Ýazmyradow ýurdumyzyň welaýatlarynda oba hojalyk işleriniň barşy, şeýle hem suw serişdelerini tygşytly we netijeli peýdalanmak maksady bilen, bugdaý ekilen meýdanlarda ösüş suwuny talabalaýyk geçirmek, bu ugurda suwaryş suwunyň üpjünçiligini gowulandyrmak boýunça degişli işleriň geçirilýändigi barada hasabat berdi.
Döwlet Baştutany Ministrler Kabinetiniň Başlygynyň obasenagat toplumyna gözegçilik edýän orunbasaryna hem-de welaýatlaryň häkimlerine ýüzlenip, ýurdumyzda ýazky bag ekmek möwsüminde saýaly, pürli, miweli baglaryň we üzüm nahallarynyň ekiljek ýerlerini taýýarlamak, şu ýylyň hasyly üçin gowaça ekiljek ýerleri ekişe taýýarlamak, bugdaý meýdanlarynda geçirilýän ideg işlerini, ýazlyk ekinleriň ekişini gözegçilikde saklamak babatda degişli tabşyryklary berdi.
Maslahatyň barşynda Serdar Berdimuhamedow şeýle hem welaýatlaryň häkimleriniň welaýatlarda gurulmagy göz öňünde tutulýan ýaşaýyş jaýlarynyň, hassahanalaryň, saglyk öýleriniň we merkezleriniň, mekdebe çenli çagalar edaralarynyň, umumybilim edaralarynyň, medeniýet öýleriniň, suw geçirijileriň, suw arassalaýjy desgalaryň, dik guýularyň, lagym geçirijileriň, lagym arassalaýjy desgalaryň, awtomobil ýollarynyň, gaz geçirijileriň, aragatnaşyk ulgamynyň, elektrik geçirijileriň gurluşyk işleriniň ýagdaýy baradaky hasabatlaryny diňledi.
