Türkmenistanda oba hojalyk pudagy üçin möhüm tapgyry alamatlandyrýan 2026-njy ýylyň bugdaý oragy möwsümine badalga berildi. Bu barada TDH habar berýär.
Ministrler Kabinetiniň mejlisinde döwlet Baştutanynyň ak pata bermegi bilen, Ahal, Lebap we Mary welaýatlarynda 3-nji iýunda galla oragyna başlanyldy. Sebitlerde geçirilen dabaralara ugurdaş düzümleriň ýolbaşçylary, hünärmenler we hormatly ýaşulular gatnaşyp, ilkinji bugdaý sünbüllerini ordular. Balkan we Daşoguz welaýatlarynyň gallaçylary bolsa galla oragyna 10-njy iýunda başlar.
Galla oragyny gysga wagtda ýokary hilli gurnamak üçin ähli zerur şertler döredildi. Şu ýyl ekerançylyk ýerlerinde bol hasyl ösdürilip ýetişdirildi. Meýdanlarda kombaýnlar, ýokary öndürijilikli we döwrebap tehnikalar bökdençsiz işledildi. Möwsümde göçme abatlaýyş we ýangyç guýujy toparlar tehnikalary ýangyç, çalgy ýaglary we ätiýaçlyk şaýlar bilen üpjün etmek üçin gije-gündizleýin esasda hyzmat eder. Şeýle hem «Türkmenstandartlary» baş döwlet gullugynyň barlaghanalary tarapyndan galla kabul ediş nokatlaryna getirilýän bugdaý hasylynyň hili dessin kesgitleniler.
Bugdaý oragynyň başlanmagy mynasybetli geçirilen önümçilik-okuw maslahatlary geçirildi we tehnikalaryň sazlaşykly işini üpjün etmegiň guramaçylykly meseleleri ara alnyp maslahatlaşyldy.
Obasenagat toplumyny döwrebaplaşdyrmak we durnukly ösdürmek döwlet syýasatynyň ileri tutulýan ugurlarynyň biridir. Pudaga uly möçberde maýa goýumlar gönükdirilip, täze elewatorlar, degirmen toplumlary we dökün zawodlary gurlup ulanmaga berilýär.
Ekerançylyk meýdanlarynda bugdaýyň ýokary hasyl berýän täze «Arkadag», «Serdar» we «Pyragy» ýaly görnüşleriniň ekilmegi hasyllylygy has-da ýokarlandyrýar.
Möhüm möwsümiň başlanmagy mynasybetli galla meýdanlarynyň golaýynda sergiler we medeni dabaralar guraldy. Bu ýerde oba hojalyk önümleri, çörek we süýji-köke önümleri, döwrebap tehnikalar görkezildi hem-de welaýatlaryň aýdym-saz, folklor toparlarynyň çykyşlary guraldy.
