24-nji iýunda Türkmenistanyň daşary işler ministri Raşid Meredow Germaniýa Federatiw Respublikasynyň Türkmenistandaky Adatdan daşary we Doly ygtyýarly ilçisi Bernd Haýns bilen duşuşyk geçirdi. Bu duşuşyk ilçiniň ýurtdaky diplomatik işini tamamlamagy bilen baglylykda guraldy diýip, DIM-iň metbugat gullugy habar berýär.
Söhbetdeşligiň dowamynda taraplar türkmen-german gatnaşyklarynyň häzirki ýagdaýyny we ileri tutulýan ugurlaryny ara alyp maslahatlaşdy. Hususan-da, syýasy-diplomatik, söwda-ykdysady hem-de medeni-ynsanperwer ugurlarda hyzmatdaşlygy mundan beýläk hem berkitmegiň mümkinçiliklerine garaldy.
Iki döwletiň arasyndaky ikitaraplaýyn hyzmatdaşlygyň gurallarynyň, şol sanda yzygiderli geçirilýän syýasy geňeşmeleriň, degişli iş toparlarynyň netijeli işiniň, şeýle hem halkara guramalaryň çägindäki özara goldawlaryň ähmiýeti aýratyn nygtaldy.
Duşuşygyň ahyrynda R.Meredow Germaniýanyň ilçisine ikitaraplaýyn gatnaşyklaryň ösdürilmegine goşan goşandy üçin minnetdarlyk bildirdi hem-de onuň geljekki işlerinde üstünlikleri arzuw etdi.
Öz gezeginde ilçi Bernd Haýns hem türkmen tarapyna diplomatik işini ýerine ýetiren döwründe görkezilen goldaw we netijeli hyzmatdaşlyk üçin çuňňur hoşallygyny beýan etdi.
