Aşgabatdaky Söwda-senagat edarasynda Türkmen-amerikan işewürlik geňeşiniň «tegelek stol» görnüşindäki maslahaty geçirildi. Çärä ýurduň ministrlikleriniň we pudaklaýyn dolandyryş edaralarynyň ýolbaşçylary hem-de geňeşiň ýerine ýetiriji direktory Erik Stýuartyň ýolbaşçylygyndaky amerikan işewürler wekiliýeti gatnaşdy diýip, TDH habar berýär.
Maslahatda Türkmenistanyň halkara tejribäni we öňdebaryjy tehnologiýalary ornaşdyrmaga açykdygy hem-de ABŞ-nyň işewür toparlarynyň türkmen bazaryndaky ornuny berkitmäge ymtylýandygy nygtaldy. Taraplar ýurtda döredilen amatly maýa goýum ýagdaýyna we işewürlik gurşawyna ýokary baha berip, amala aşyrylan özara saparlaryň gatnaşyklarda täze tapgyryň başyny başlandygyny belledi.
Söwda-maýa goýum işlerinde senagat, oba hojalygy we suw hojalygy üçin tehnikalary ibermek hyzmatdaşlygyň ileri tutulýan ugurlarynyň hatarynda görkezildi. Şeýle hem ýangyç-energetika, ulag-aragatnaşyk, gurluşyk, innowasion tehnologiýalar, kiberhowpsuzlyk, saglygy goraýyş we ekologiýa ulgamlarynda hyzmatdaşlygyň täze derejä çykarylmagy öňe sürüldi. Gatnaşyjylar haryt dolanyşygyny giňeltmegiň mümkinçiliklerini ara alyp maslahatlaşyp, bilelikde işlemegiň anyk meýilnamalaryny kesgitledi.
Iki ýurduň işewürleri ykdysady gatnaşyklary ösdürmekde täze platformalaryň ähmiýetine aýratyn ünsi çekdi. Şunuň bilen baglylykda, 2026-njy ýylyň maý aýynda döredilen Türkmen-amerikan işewürlik hyzmatdaşlygy birleşiginiň (TABCA) söwda-ykdysady gatnaşyklary has-da çuňlaşdyrmakda netijeli meýdança bolup hyzmat etjekdigine ynam bildirildi. Maslahatyň çäklerinde guralan ikitaraplaýyn duşuşyklar soňky ýyllarda täze depgine eýe bolan türkmen-amerikan hyzmatdaşlygynyň geljekde hem üstünlikli dowam etdiriljekdigini tassyklady.
