Maý aýynyň birinji we ikinji on günlüklerinde üýtgäp duran howa şertlerinden soň, Türkmenistanda tomus döwrüne mahsus howa – temperatura ýokarlanyp, az bulutly, açyk, çyglylygy pes howa başlandy diýip, «Meteožurnal» habar berýär.
Türkmenistanyň birnäçe sebitinde temperatura + 40° C-den geçdi. Soňky iki günüň içinde ýurduň günbatarynda yssy boldy. Bereketde (Gazanjykda) +40,1°a çenli galdy, Balkanabatda edil şonuň ýaly howa boldy. Etrekde +40,5°.
Günbatarda we ýurduň merkezi sebitlerinde temperaturanyň kadadan ep-esli ýokarlanandygy bellige alyndy.
Ahal welaýatynda temperatura +40° töweregi. Aşgabatda 25-ine +39°, düýn +38,7° boldy. Bäherdende iň ýokary temperatura + 38,7°-a, Tejende +39°-a çenli.
Beýleki sebitlerde Gazagystanyň çäginden howa akymlarynyň gelmegi sebäpli howanyň temperaturasy ep-esli pes, şeýle-de bolsa hepdäniň başynda yssy bolupdy. Türkmenabatda 25-ine iň ýokary temperatura + 32,9°, Daşoguzda + 32,4° boldy.
Ýakyn günlerde temperatura +34… +39° aralygyndaky, käbir ýerlerde +41°-a çenli galar. Günüň çogy köp bolup, ygal bolmaz.
