Şu gün, 8-nji maýda Prezident Serdar Berdimuhamedow ýurdumyzyň oba hojalyk toplumynda hem-de welaýatlarda alnyp barylýan işleriň barşy bilen bagly meseleleri maslahatlaşdy. Maslahata obasenagat toplumyna gözegçilik edýän wise-premýer A.Ýazmyradow hem-de welaýatlaryň häkimleri gatnaşdy.
Maslahatyň barşynda welaýatlaryň häkimleri häzirki wagtda dowam edýän möwsümleýin oba hojalyk işleriniň alnyp barlyşy barada hasabat berdiler.
Şeýle hem ýurdumyzyň Konstitusiýasynyň we Döwlet baýdagynyň güni mynasybetli welaýatlarda geçirilmegi meýilleşdirilýän çärelere taýýarlyk görlüşi, şeýle hem şu ýyl açylyp ulanylmaga berilmegi göz öňünde tutulýan dürli maksatly desgalarda we binalarda, inženerçilik ulgamlarynda ýerine ýetirilýän gurluşyk işleriniň barşy barada hasabat berildi.
Wise-premýer A.Ýazmyradow ýurdumyzyň welaýatlarynda dowam edýän möwsümleýin oba hojalyk işleriniň barşy barada hasabat berdi.
Serdar Berdimuhamedow hasabatlary diňläp, häzirki wagtda alnyp barylýan möwsümleýin oba hojalyk işlerini bellenen möhletlerde we talabalaýyk ýerine ýetirilmeginiň möhüm wezipe bolup durýandygyna ünsi çekdi.
Döwlet Baştutanymyz obasenagat toplumyna gözegçilik edýän wise-premýerine hem-de welaýatlaryň häkimlerine ýüzlenip, ýurdumyzyň oba hojalyk pudagynyň öňünde möhüm wezipeleriň durýandygyny belledi.
