TmCars.info-nyň ozal habar berşi ýaly, 27-nji ýanwarda Prezident Gurbanguly Berdimuhamedow Hindistan Respublikasynyň Premýer-ministri Narendra Modiniň çakylygy boýunça sanly ulgam arkaly geçirilen birinji “Merkezi Aziýa — Hindistan” sammitine gatnaşyp, çykyş etdi we birnäçe täze teklipleri hödürledi. Sammitiň gün tertibine bar bolan ägirt uly kuwwaty hem-de uzak möhletli geljegi nazara almak bilen, netijeli hyzmatdaşlygyň ileri tutulýan meseleleri girizildi.
Türkmen Lideriniň belleýşi ýaly, birinji «Merkezi Aziýa — Hindistan» sammiti ýeňil bolmadyk şertlerde geçirilýär. Umumy halkara durnuksyzlyga pandemiýa howpy we beýleki wehimler hem goşuldy. Halkara ýagdaýyň dartgynlylaşýan, gapma-garşylyklaryň artýan, halkara hukugyň kadalarynyň ýoýulýan, kähalatlarda bolsa aç-açan äsgerilmeýän şertlerinde jogapkärçilik, pähim-parasat örän möhümdir. Emma, şunuň bilen birlikde, şol howply meýillere berk hem-de aýgytly garşy durmak, terrorçylyga, radikalizme we ekstremizme, guramaçylykly jenaýatçylyga garşy bilelikde göreşmek hem örän wajypdyr.
Şeýle hem Prezident Gurbanguly Berdimuhamedow sammitde anyk teklipleriň birnäçesini beýan etdi. Olar, hususan-da:
- «Merkezi Aziýa — Hindistan» sammitiniň Sekretariatyny döretmek;
- «Merkezi Aziýa — Hindistan» Parlament forumy baradaky teklibi goldamak;
- Howpsuzlyk boýunça geňeşçileriň derejesinde yzygiderli dialog geçirmek başlangyjyny goldamak;
- Türkmenistanyň öňe süren «Dialog — parahatçylygyň kepili» diýen täze filosofiýasyny goldamaga çagyryp, bu ugurda halkara guramalarda, ilki bilen, BMG-de ulgamlaýyn bilelikdäki işi ýola goýmak;
- «Merkezi Aziýa — Hindistan» işewürlik geňeşine hyzmatdaşlygyň ugurlaryny anyklaşdyrmagy, ýakyn geljekde amala aşyrylmaly bilelikdäki taslamalara ünsi jemlemegi tabşyrmak;
- «Merkezi Aziýa — Hindistan» energetika köprüsini döretmegiň üstünde düýpli işlemek;
- Hindi tarapynyň Çabahar portuny Demirgazyk — Günorta halkara ulag geçelgesiniň düzümine goşmak hem-de degişli bilelikdäki Iş toparyny döretmek hakyndaky teklibini goldap, Türkmenbaşy Halkara deňiz portuny bu üstaşyr ugra goşmak baradaky meselä seretmek;
- «Merkezi Aziýa — Hindistan» lukmançylyk assosiasiýasyny döretmek meselesine seretmek;
- ýubileý ýylynda ýurtlarymyzyň şäherlerinde bilelikdäki medeni çäreleriň tapgyryny guramak bilen baglanyşykly tekliplerden ybaratdyr.
