Prezident Serdar Berdimuhamedow Türkmenistanyň ähli welaýatlarynda 26-njy martda gowaça ekişine başlamaga ak pata berdi. Döwlet Baştutany hormatly ýaşulularymyzdan gowaça ekişine “Bismilla” bilen başlap bermeklerini haýyş edip, Diýarymyzyň edermen pagtaçy babadaýhanlaryna, ähli oba hojalyk işgärlerine alyp barýan işlerinde uly üstünlikleri arzuw etdi. Bu barada anna güni Hökümet mejlisiniň barşynda aýdyldy.
Mejlisiň dowamynda wise-premýer T.Atahallyýew ýurdumyzyň oba hojalyk toplumynda hem-de welaýatlarda dowam edýän işler barada hasabat berdi.
Bellenilişi ýaly, bugdaý ekilen meýdanlarda agrotehnikanyň kadalaryna laýyklykda mineral dökünler bilen iýmitlendirmek, ösüş suwuny tutmak işleri geçirilýär. Ýazlyk ekinleri ekmek, ýeralma, gök-bakja ekinleri ekilen meýdanlarda ideg işleri dowam edýär. Welaýatlarda gowaça ekişi möwsümine başlamak boýunça degişli taýýarlyk işleri alnyp barylýar. Häzirki wagtda ekişde ulanyljak oba hojalyk tehnikalary we gurallar, gowaça tohumlary möwsüme taýýar edildi.
Wise-premýer gowaça ekişini agrotehniki möhletlerde ýokary hilli geçirmek maksady bilen, döwlet Baştutanyna ussat daýhanlaryň, tejribeli hünärmenleriň, alymlardyr mehanizatorlaryň gatnaşmagynda ýurdumyzyň welaýatlarynda tejribe maslahatlaryny geçirmegiň, il içinde hormatlanylýan ýaşulularyň gatnaşmagynda gowaça ekişine başlamagyň senesini belläp, oňa ak pata bermegi baradaky haýyş bilen ýüzlendi.
