Aşgabatda Türkmenistanyň halyçylarynyň arasynda “Zenan kalby bilen döredilen gözellik” atly bäsleşik geçirildi. Bu ýyl ol beýik türkmen şahyry Magtymguly Pyragynyň 300 ýyllygyna bagyşlandy diýip, Türkmenistan Halkara habarlar portaly habar berýär.
Emin agzalaryna baha bermek üçin 100-e golaý bezeg, peýzaž we portret halylary hödürlendi. Olaryň ululygy 0,5 – 6 inedördül metr aralygynda üýtgeýär. Bäsleşige gatnaşyjylar diňe bir öz halylaryny görkezmän, eýsem olaryň önümçilik usullary barada hem gürrüň berdiler, sebäbi Türkmenistanyň bäş welaýatynyň her birinde haly dokamagyň öz inçelikleri we aýratynlyklary bar.
Şu ýyl bäsleşik “Pähim-paýhas ummany Magtymguly Pyragy” şygary bilen geçirildi, şonuň üçin köp halylarda şygara laýyk nyşanlary ýa-da şahyryň öz keşbini görmek bolýar.
Bäsleşige aýratyn halyçylardan başga-da, sebitlerden çeper haly önümçilik kärhanalary-da gatnaşdy.
Şu ýyl iň gowulary diýip Laçyn Rozyýewanyň (Lebap welaýaty) we Baýramgül Sahyýewanyň (Aşgabat) halylary saýlandy. Ýeňijiler gymmatly baýraklar we diplomlar bilen sylaglandy.
Bäsleşik elde haly dokamak sungatyny ýaýratmak we onuň iň gowy däplerini saklap galmak maksady bilen geçirilýär.
