4-nji martda Prezident Serdar Berdimuhamedow obasenagat toplumyna gözegçilik edýän wise-premýer T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Maslahatda ýurdumyzyň oba hojalyk toplumynda hem-de welaýatlarynda alnyp barylýan möwsümleýin işleriň barşy bilen bagly meselelere garaldy.
Maslahatyň barşynda welaýatlaryň häkimleri hem-de obasenagat toplumyna gözegçilik edýän orunbasary T.Atahallyýew ýurdumyzda alnyp barylýan möwsümleýin oba hojalyk işleriniň barşy barada hasabat berdiler.
Bellenilişi ýaly, ýurdumyzda şu ýylda bugdaýyň bol hasylyny öndürmek arkaly azyk bolçulygyny has-da pugtalandyrmak maksady bilen,
welaýatlaryň bugdaý ekilen meýdanlarynda agrotehnikanyň kadalaryna laýyklykda mineral dökünler bilen iýmitlendirmek we ösüş suwuny tutmak işleri dowam edýär.
Şu ýylyň hasyly üçin gowaça ekiljek meýdanlarda ýerleri tekizlemek hem-de tekizleýiş işleri geçirilen meýdanlarda geriş we çil çekmek işleri ýerine ýetirilýär. Oba hojalyk işlerinde ulanyljak ähli tehnikalary we gurallary, pagtaçy babadaýhanlar üçin ýokary hilli gowaça tohumlary möwsüme doly taýýar etmek boýunça degişli işleri ýerine ýetirilýär.
Ýurdumyzda ýeralmanyň we beýleki gök-bakja ekinleriniň öndürilýän möçberlerini artdyrmak hem-de bu önümler bilen ilatymyzy bolelin üpjün etmek maksady bilen häzirki wagtda welaýatlarda ýazlyk ekinleriniň ekişi dowam edýär.
Türkmenistanyň Prezidenti hasabaty diňläp, möwsümleýin oba hojalyk işlerini bellenen agrotehniki möhletlerde geçirmek babatda wise-premýere tabşyryklary berdi.
Döwlet Baştutany welaýatlaryň häkimlerine ýüzlenip, ýazlyk ýeralmanyň, soganyň we beýleki gök-bakja ekinleriniň ekişiniň guramaçylykly we bökdençsiz geçirilmeginiň, ekiş we ideg işlerinde ulanyljak ähli oba hojalyk tehnikalarynyň hem-de gurallarynyň möwsüme doly taýýar edilmeginiň zerur talap bolup durýandygyny belledi we bu ugurda ýerine ýetirilmeli işler babatda degişli görkezmeleri berdi.
