4-nji noýabrda Prezident Serdar Berdimuhamedow Türkmenistanyň ähli sebitlerini gurşap alan ählihalk bag ekmek dabarasyna gatnaşdy. Şeýle hem döwlet Baştutany ahalteke bedewlerini ösdürip ýetişdirmek boýunça alnyp barylýan işler bilen tanyşdy diýip, TDH habar berýär.
Bu möhüm ekologiýa çäresi Aşgabat şäherinde we ýurdumyzyň ähli welaýatlarynda ýokary guramaçylyk derejesine beslendi.
Şu gezekki ählihalk bag ekmek çäresinde saýaly, pürli we miweli bag nahallarynyň 472 müň 71 düýbi ekildi. Şeýle hem seýilgähleriň we döredilen tokaý zolaklarynyň çäklerini arassalamak we abadanlaşdyrmak işleri bilen birlikde jemi 1 million 868 müň 935 düýp baglara ideg edildi.
