Prezident Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda hem-de welaýatlarynda alnyp barylýan işleriň barşy bilen bagly meselelere garaldy.
Ilki bilen häkimler welaýatlarda alnyp barylýan oba hojalyk işleri barada hasabat berdiler.
Bellenilişi ýaly, häzirki wagtda welaýatyň ekerançylyk meýdanlarynda bugdaý ekişi guramaçylykly dowam edýär, ekiş geçirilen ýerlerde gögeriş suwy tutulýar. Şunda oba hojalyk tehnikalaryndan we gurallaryndan netijeli peýdalanylýar, bugdaý öndürijiler ýokary hilli tohumlar bilen üpjün edilýär.
Şeýle hem häkimler, ýurdumyzyň Garaşsyzlygynyň 32 ýyllyk baýramyna taýýarlyk görlüşi hem-de şu ýylda welaýatda açylyp ulanmaga berilmegi meýilleşdirilen dürli maksatly desgalardaky gurluşyk işleriniň barşy barada hasabat berdiler.
Soňra Ministrler Kabinetiniň Başlygynyň obasenagat toplumyna gözegçilik edýän orunbasary T.Atahallyýew ýurdumyzda alnyp barylýan oba hojalyk işleriniň barşy barada hasabat berdi.
Ahal, Balkan, Lebap we Mary welaýatlarynda pagta ýygymyna guramaçylykly girişildi. Daşoguz welaýatynda bolsa, ýygyma başlamak boýunça taýýarlyk işleri alnyp barylýar.
Mundan başga-da, wise-premýer Daşoguz hem-de Lebap welaýatlarynyň şaly ekilen meýdanlarynda, Mary welaýatynyň gant şugundyry ekilen meýdanlarynda degişli ideg işleriniň dowam edýändigini habar berdi.
Döwlet Baştutany iş maslahatyna gatnaşyjylara ýüzlenip, oba hojalygyndaky bu möhüm möwsümi üstünlikli geçirmek üçin ähli zerur tagallalaryň edilmelidigini, ekerançylyk meýdanlarynyň suw bilen ýeterlik derejede üpjün edilmelidigini, şeýle hem güýzlük ekinlere ideg işleriniň agrotehnikanyň kadalaryna laýyklykda alnyp barylmalydygyny belledi we bu babatda birnäçe tabşyryklary berdi.
