2023-nji ýylyň ýanwar-iýun aýlarynda Türkmenistanda halk hojalygynyň ähli pudaklarynda alnyp barlan işleriň netijelerine bagyşlanyp geçirilen giňişleýin Hökümet mejlisiniň barşynda Serdar Berdimuhamedow käbir welaýatlaryň häkimlerini wezipesinden boşatdy we täzelerini belledi.
«Watan» habarlar gepleşiginde habar berlişi ýaly, Prezident Serdar Berdimuhamedow işde goýberen düýpli kemçilikleri üçin Ahal welaýatynyň häkimi Ý.Gurbanowy eýeleýän wezipesinden boşatdy.
Ahal welaýatynyň häkimi wezipesine R.Hojagulyýew bellenilip, ol Ahal welaýatynyň Ak bugdaý etrabynyň häkimi wezipesinden boşadyldy.
Balkan welaýatynyň häkimi wezipesine H.Aşyrmyradow bellenilip, ol Ahal welaýatynyň häkiminiň orunbasary wezipesinden boşadyldy.
Daşoguz welaýatynyň häkimi N.Nazarmyradow başga işe geçmegi sebäpli, eýeleýän wezipesinden boşadyldy.
Daşoguz welaýtanynyň häkimi wezipesine S.Soltanmyradow bellenilip, ol Ahal welaýatynyň Bäherden etrabynyň häkimi wezipesinden boşadyldy.
Mary welaýatynyň häkimi D.Annaberdiýew işde goýberen düýpli kemçilikleri üçin Mary welaýatynyň häkimi wezipesinden boşadyldy.
Mary welaýatynyň häkimi wezipesine B.Orazow bellenildi.
Döwlet Baştutany degişli resminamalara gol çekip, täze ýolbaşçylara işinde üstünlikleri arzuw etdi.
