Şu gün, 27-nji martda Prezident Serdar Berdimuhamedow degişli ýolbaşçylar bilen oba hojalyk toplumynda hem-de ýurdumyzyň welaýatlarynda alnyp barylýan işleriň ýerine ýetirilişi bilen bagly meseleleri maslahatlaşdy.
Sanly ulgam arkaly geçirilen iş maslahatyna obasenagat toplumyna gözegçilik edýän wise-premýer A.Ýazmyradow hem-de welaýatlaryň häkimleri gatnaşdy.
Maslahatyň barşynda welaýatlaryň häkimleri häzirki wagtda ýerlerde alnyp barylýan möwsümleýin oba hojalyk işleriniň barşy barada hasabat berdiler.
Bellenilişi ýaly, bugdaýa ideg etmek işleri agrotehnikanyň kadalaryna laýyklykda ýerine ýetirilýär, hususan-da, ösüş suwuny tutmak we mineral dökünler bilen iýmitlendirmek işleri geçirilýär. Şeýle hem welaýatlarda gowaça ekişine guramaçylykly girişilip, ekişde oba hojalyk tehnikalary we gurallary doly güýjünde işledilýär.
Wise-premýer A.Ýazmyradow ýurdumyzyň welaýatlarynda ýerine ýetirilýän oba hojalyk işleriniň barşy barada hasabat berdi.
Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasaryna hem-de welaýatlaryň häkimlerine ýüzlenip, gowaça ekişini ýokary hilli we agrotehniki möhletlerde geçirmek, şeýle hem bugdaýa, ýazlyk ýeralma, sogana we beýleki gök-bakja ekinlerine talabalaýyk ideg etmek hem-de pile öndürmek möwsümine guramaçylykly taýýarlyk görmek babatda degişli tabşyryklary berdi.
