20-nji fewralda Prezident Serdar Berdimuhamedow obasenagat toplumy boýunça wise-premýer A.Ýazmyradowyň hem-de welaýatlaryň häkimleriniň gatnaşmagynda ýerlerde alnyp barylýan möwsümleýin oba hojalyk işleri bilen baglanyşykly iş maslahatyny geçirdi.
Maslahatyň barşynda welaýatlaryň häkimleri ekerançylyk meýdanlarynda alnyp barylýan işleriň barşy barada hasabat berdiler.
Şeýle hem häkimler ýurdumyzy 2022-2028-nji ýyllarda durmuş-ykdysady taýdan ösdürmegiň Maksatnamasyna laýyklykda welaýatlarda meýilleşdirilen gurluşyk işleriniň ýerine ýetirilişi barada hasabat berdiler.
Wise-premýer A.Ýazmyradow ýurdumyzyň welaýatlarynda alnyp barylýan oba hojalyk işleriniň ýagdaýy barada hasabat berdi.
Bellenilişi ýaly, welaýatlaryň ak ekin meýdanlarynda bugdaýa ideg etmek işleri alnyp barylýar, birinji gezek mineral dökünler bilen iýmitlendirmek hem-de ikinji ösüş suwyny tutmak işleri dowam edýär.
Oba hojalyk we daşky gurşawy goramak ministrliginiň tejribeli hünärmenleri hem-de alymlary ýurdumyzyň welaýatlarynda oba hojalyk işleriniň alnyp barlyşyna ýardam hem-de maslahatlary bermek üçin yzygiderli iş saparlarynda bolýarlar.
Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasaryna hem-de welaýatlaryň häkimlerine ýüzlenip, häzirki wagtda dowam edýän möwsümleýin oba hojalyk işleriniň agrotehnikanyň talaplaryny berk berjaý etmek arkaly geçirilmegini üpjün etmek babatda degişli tabşyryklary berdi.
