3-nji ýanwarda Prezident Serdar Berdimuhamedow 2023-nji ýylda sanly ulgam arkaly ilkinji iş maslahatyny geçirdi. Obasenagat toplumyna gözegçilik edýän wise-premýer A.Ýazmyradowyň hem-de welaýatlaryň häkimleriniň gatnaşmagynda geçirilen maslahatda oba hojalyk toplumyndaky hem-de ýurdumyzyň welaýatlarynda alnyp barylýan işleriň barşy bilen baglanyşykly meselelere garaldy.
Maslahatyň dowamynda welaýat häkimleri häzirki wagtda ýerlerde alnyp barylýan oba hojalyk işleriniň barşy, şeýle hem kabul edilen Maksatnamalara laýyklykda meýilleşdirilen işleriň ýerine ýetirilişi barada hasabat berdiler.
Şeýle hem häkimler welaýatlarda ýyladyş ulgamlaryny kadaly işletmek, elektrik energiýasy, suw we tebigy gaz bilen bökdençsiz üpjün etmek ugrunda görülýän zerur çäreler barada habar berdiler.
Wise-premýer A.Ýazmyradow ýurdumyzyň welaýatlaryndaky möwsümleýin oba hojalyk işleriniň ýagdaýy hem-de pudagyň maddy-enjamlaýyn binýadyny pugtalandyrmak boýunça alnyp barylýan işler barada hasabat berdi.
Serdar Berdimuhamedow obasenagat toplumy boýunça wise-premýere hem-de welaýatlaryň häkimlerine ýüzlenip, möwsümleýin oba hojalyk işleriniň, hususan-da, bugdaýa ideg etmek, gowaça ekiljek meýdanlary sürmek işleriniň agrotehnikanyň kadalaryna laýyklykda geçirilmeginiň üpjün edilmegine hem-de şu günki günüň wajyp meseleleriniň biri bolan kärendeçiligi ösdürmäge jogapkärçilikli çemeleşmegiň zerurdygyny aýtdy we degişli tabşyryklary berdi.
