24-nji dekabrda Tokioda «Merkezi Aziýa + Ýaponiýa» Dialogynyň agza ýurtlarynyň daşary işler ministrleriniň 9-njy Mejlisi geçirildi. Onuň işine Ýaponiýanyň, Gazagystanyň, Gyrgyzystanyň, Täjigistanyň, Türkmenistanyň we Özbegistanyň daşary syýasat edaralarynyň ýolbaşçylary, bu ýurduň ilçileri gatnaşdylar diýip, Türkmenistanyň DIM-niň saýty habar berýär.
Daşary syýasat edaralarynyň ýolbaşçylary mejlisde gezekli-gezegine söz sözlediler.
Dialogyň çäklerinde taraplar bilelikdäki hyzmatdaşlyk meselelerini we Merkezi Aziýa sebitiniň durnukly ösüşini maslahatlaşdylar. Mundan başga-da, gün tertibine halkara meseleler, şol sanda Ukrainadaky we Owganystandaky ýagdaýlar girizildi.
Mejlis tamamlanandan soň, Merkezi Aziýa ýurtlarynyň we Ýaponiýanyň daşary syýasat edaralarynyň metbugat maslahaty geçirildi.
Belläp geçsek, «Merkezi Aziýa + Ýaponiýa» Dialogy sebit hyzmatdaşlygyny ösdürmek üçin 2004-nji ýylda döredildi.
