Ministrler Kabinetiniň Başlygynyň käbir orunbasarlarynyň hem-de Aşgabat şäheriniň we welaýatlaryň häkimleriniň gatnaşmagynda sanly ulgam arkaly 31-nji ýanwarda geçirilen iş maslahatynda ÝUNESKO bilen hyzmatdaşlygy giňeltmek bilen bagly tabşyryklary bereninden soňra, Prezident Gurbanguly Berdimuhamedow wise-premýer E.Orazgeldiýewiň hem-de welaýatlaryň häkimleriniň hasabatlaryny diňledi.
Ilki bilen, sebitleriň ýolbaşçylary welaýatlarda alnyp barylýan işler barada gezekli-gezegine hasabat berdiler. Soňra Ministrler Kabinetiniň Başlygynyň obasenagat toplumyna gözegçilik edýän orunbasary E.Orazgeldiýew ýazlyk ýeralmanyň hem-de soganyň ekişine, tohumlary hem-de ekişde ulanyljak tehnikalardyr gurallary möwsüme taýýarlamak işleri barada hasabat berdi.
Bellenilişi ýaly, şu ýylyň fewral aýynda ýurdumyzyň welaýatlarynda 30 müň gektar ýerde ýazlyk ýeralmanyň, 10 müň gektar meýdanda soganyň ekişini geçirmek meýilleşdirilýär. Tutuş 2022-nji ýylda 106 müň gektar meýdanda ýeralma hem-de beýleki gök we bakja ekinlerini ekmek meýilleşdirilýär. Şol sanda 65 müň gektar ýerde ýazlyk ekiş, 41 müň gektar ýerde güýzlük ekiş geçiriler. Şunuň bilen baglylykda, ýerleri ekişe taýýarlamak boýunça degişli işler alnyp barylýar.
