Türkmenistanyň Prezidenti Serdar Berdimuhamedow sanly ulgam arkaly wise-premýer T.Atahallyýewiň we welaýatlaryň häkimleriniň gatnaşmagynda iş maslahatyny geçirdi. Maslahatda welaýatlarda alnyp barylýan häzirki oba hojalyk we gurluşyk işleri ara alnyp maslahatlaşyldy.
Welaýatlaryň ýolbaşçylary ekiş möwsüminiň barşy barada hasabat berdi. Meýdanlarda bugdaýa ideg etmek — dökünler bilen iýmitlendirmek we suwarmak işleri dowam edýär. Gowaça ekişi, şeýle hem ýeralma we gök-bakja ekinlerini ösdürip ýetişdirmek boýunça işler alnyp barylýar. Pile öndürmek işine hem aýratyn üns berilýär.
Howanyň gyzmagy bilen baglylykda, sebitlerde ýangynlaryň öňüni almak maksady bilen, meýdanlary sürmek we çäkleri arassalamak işleri geçirilýär.
Şeýle hem şu ýyl ulanmaga berilmegi meýilleşdirilen durmuş we önümçilik maksatly desgalaryň gurluşygy barada habar berildi.
Iş maslahatynyň jemleri boýunça döwlet Baştutany agrotehniki kadalaryň berjaý edilmegini üpjün etmegi, gowaça ekişini bellenen möhletlerde tamamlamagy we oba hojalyk ekinlerine ideg edilişine gözegçiligi güýçlendirmegi tabşyrdy.
Mundan başga-da, Prezident welaýatlardaky desgalaryň gurluşygynyň hiline we möhletlerine berk gözegçilik etmegi tabşyrdy.
