Türkmenistanyň Prezidenti Serdar Berdimuhamedow oba hojalyk ministri Çaryýar Çetiýewiň we welaýatlaryň häkimleriniň gatnaşmagynda sanly ulgam arkaly iş maslahatyny geçirdi diýip, «Watan» habarlar gepleşiginde habar berildi. Maslahatda möwsümleýin oba hojalyk işlerini geçirmegiň we sebitlerde durmuş-ykdysady ösüş maksatnamalaryny durmuşa geçirmegiň meselelerine garaldy.
Ahal, Balkan, Daşoguz, Lebap we Mary welaýatlarynyň häkimleri alnyp barylýan işler barada hasabat berdi. Sebitlerde bugdaý ekilen meýdanlaryny mineral dökünler bilen iýmitlendirmek we suwaryş işleri alnyp barylýar, gowaça ekişini agrotehniki möhletlerde geçirmek üçin degişli işler dowam edýär. Şeýle hem ýeralma we gök-bakja ekinlerine ideg işleri amala aşyrylýar.
Pile öndürmek möwsümine taýýarlyk görülýändigi bellenildi: öndürijiler bilen şertnamalar baglaşylýar, ýüpekçi kärendeçileri ýüpek gurçugynyň tohumy bilen üpjün etmek boýunça çäreler görülýär.
Şeýle-de, häkimler şu ýyl ulanmaga berilmegi meýilleşdirilýän medeni-durmuş we önümçilik maksatly desgalaryň gurluşygynyň barşy barada hasabat berdi.
Döwlet Baştutany ýokary hasyl almak, ýer we suw serişdelerini netijeli ulanmak hem-de pudagy durnukly ösdürmek üçin oba hojalyk önümçiliginiň ähli tapgyrlarynda agrotehniki kadalaryň gyşarnyksyz berjaý edilmeginiň möhümdigini nygtady. Sebitleriň ýolbaşçylaryna gowaça ekişini, bugdaýa we ýazlyk ekinlere ideg işlerini hemişelik gözegçilikde saklamak, pile öndürmek möwsümine düýpli taýýarlyk görmek, şeýle hem gurluşyk işleriniň wagtynda we ýokary hilli ýerine ýetirilmegini üpjün etmek tabşyryldy.
