Balkan welaýatynyň Türkmenbaşy şäherinde Halkara Deňiz Guramasy we Halkara Gidrografik Guramasy bilen bilelikde sebitleýin okuw maslahaty geçiriler. Prezident Serdar Berdimuhamedow 23-nji oktýabrda geçirilen Hökümet mejlisinde bu baradaky teklibi makullap, wise-premýere degişli işleri geçirmegi tabşyrdy.
Mejlisiň barşynda wise-premýer M.Çakyýew deňiz-derýa ulaglary pudagy üçin halkara derejeli hünärmenleri taýýarlamak boýunça alnyp barylýan işler barada hasabat berdi.
Bellenilişi ýaly, ýurdumyzda Halkara Deňiz Guramasynyň (IMO) degişli halkara konwensiýalarynyň talaplaryny ýokary derejede üpjün etmek we bu ugurda deňizçileriň hünär derejesini ýokarlandyrmak maksady bilen zerur işler alnyp barylýar.
Prezident Serdar Berdimuhamedow hasabaty diňläp, ýurdumyzyň deňiz söwda flotunyň işini kämilleşdirmek, bu ugurda ýokary derejeli hünärmenleri taýýarlamak boýunça netijeli işleriň alnyp barylýandygyny belledi.
