Özbegistanyň Prezidenti Şawkat Mirziýoýew Türkmenistanyň Prezidenti Serdar Berdimuhamedowy hem-de Türkmenistanyň Halk Maslahatynyň Başlygy Gurbanguly Berdimuhamedowy Türkmenbaşy şäherindäki “Awaza” milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji maslahatynyň ýokary derejede geçirilmegi bilen gutlap, minnetdarlyk hatlaryny iberdi.
Özbek lideri forumyň çäklerinde Awaza syýasy Jarnamasynyň kabul edilendigini, şeýle hem Hereketleriň onýyllyk maksatnamasynyň tassyklanandygyny aýratyn kanagatlanma bilen belledi. "Geçirilen açyk we netijeli ikitaraplaýyn gepleşikleriň dostlukly döwletlerimiziň arasynda söwda-ykdysady, maýa goýum, ulag-logistika, medeni-ynsanperwer ugurly gatnaşyklary okgunly ösdürmäge ýardam etjekdigine berk ynanýaryn" diýip, Mirziýoýew aýdýar.
Şeýle hem Şawkat Mirziýoýew saparynyň çäklerinde özüniň ýokary döwlet sylagy — Türkmenistanyň “Hyzmatdaşlygy ösdürmäge goşandy üçin” ordeni bilen sylaglandyklary üçin Türkmenistanyň Prezidentine, Halk Maslahatynyň Başlygyna, şeýle-de doganlyk türkmen halkyna tüýs ýürekden hoşallygyny beýan etdi.
"Bu ýokary sylagy diňe bir maňa we ähli özbek halkyna bildirilen sylag-hormatyň nyşany hökmünde däl-de, eýsem, biziň doganlyk halklarymyzyň arasyndaky baky dostlugyň nyşany hökmünde hem kabul edýärin. Siziň ýakynda ýurdumyza amala aşyrjak saparyňyzyň ikitaraplaýyn hoşniýetli goňşuçylyk we strategik hyzmatdaşlyk gatnaşyklaryny düýpgöter täze derejä çykarjakdygyna berk ynanýaryn" diýip, özbek Lideri belledi.
