“Awaza” Kongresler merkezinde BMG-niň Deňze çykalgasy bolmadyk ösüp barýan döwletler boýunça üçünji maslahatynyň açylyş dabarasy geçirildi. Dabarada Türkmenistanyň Halk Maslahatynyň Başlygy Gurbanguly Berdimuhamedow ýurdumyzyň daşary syýasatynyň ileri tutulýan ugurlaryny beýan edip, çykyş etdi.
Gurbanguly Berdimuhamedow çykyşynda Türkmenistanyň hemişelik Bitaraplygynyň halkara we sebit ähmiýetli meseleler boýunça hormat goýulýan köptaraplaýyn dialogyň binýady bolup hyzmat edýändigini nygtady. Şeýle hem, türkmen halkynyň Milli Lideri ýurdumyzyň durnukly ösüşi üpjün etmäge gönükdirilen çemeleşmeleriň tarapdary bolup çykyş edýändigini aýtdy. Bu çemeleşmeler ulag ulgamynyň integrasiýasyny, energetika howpsuzlygyny, suw serişdelerini, azyk howpsuzlygyny we saglygy goraýyş ulgamyna elýeterliligi öz içine alýar.
Türkmen halkynyň Milli Lideri maslahatyň halkara hyzmatdaşlyga güýçli itergi berjekdigine, döwletleriň we halkara guramalaryň netijeli dialoga taýýardygyny görkezjekdigine ynam bildirdi.
Çykyşynyň ahyrynda Gurbanguly Berdimuhamedow maslahata gatnaşyjylara üstünlik arzuw edip, onuň netijeleriniň halkara hyzmatdaşlygyň geljekki ösüşine berk binýat boljakdygyna ynam bildirdi.
