4-nji awgustda “Awaza” milli syýahatçylyk zolagynda BMG-niň deňze çykalgasy bolmadyk ösüp ýurtlar boýunça üçünji maslahatynyň (LLDC3) çäginde Parlament forumy geçirildi. Forumyň çäginde Türkmenistanyň Mejlisiniň Başlygy Dünýägözel Gulmanowa Özbegistanyň, Azerbaýjanyň, Russiýanyň we Marokkonyň parlament wekiliýetleri bilen duşuşyklary geçirdi.
Özbegistanyň Oliý Majlisiniň Senatynyň Başlygy Tanzila Narbaýewa bilen geçirilen gepleşiklerde taraplar ikitaraplaýyn hyzmatdaşlygyň ýokary depginini belläp geçdiler. Iki ýurduň Liderleriniň arasynda alnyp barylýan işjeň dialog esasynda ösdürilýän parlamentara gatnaşyklarynyň täze derejä çykandygy nygtaldy. Özbegistan “ýaşyl” logistika, infrastruktura we sanly çözgütler boýunça yzygiderli dialogy ýola goýmagy teklip etdi hem-de Termiz – Mazar-e-Şarif – Kabul – Peşewar ugurly owganüsti geçelgesi ýaly taslamalaryň ähmiýetine ünsi çekdi. Bu ugruň Merkezi we Günorta Aziýanyň arasynda söwda gatnaşyklaryny ep-esli giňeltjekdigi bellenildi. Şeýle-de, kanunçykaryjylyk işi, söwda we üstaşyr amallarynyň ýeňilleşdirilmegi babatda tejribe alyşmagyň möhümdigi nygtaldy.
Azerbaýjanyň Milli Mejlisiniň Başlygy Sahyba Gafarowa bilen duşuşykda bolsa, Türkmenistanyň Halk Maslahatynyň Başlygynyň Azerbaýjana amala aşyran soňky saparynyň ikitaraplaýyn gatnaşyklara täze itergi berendigi bellenildi. Parlamentara dialogyň ýurtlaryň arasyndaky hyzmatdaşlygyň möhüm bölegi bolup durýandygy aýdylyp, hyzmatdaşlygyň giňeldilmegine taýýardyklary tassyklandy.
Russiýanyň Federasiýa Geňeşiniň başlygynyň orunbasary Konstantin Kosaçýow bilen geçirilen duşuşykda BMG-niň maslahaty we parlament forumynyň parlamentara gatnaşyklary ösdürmekde eýeleýän ähmiýeti ara alnyp maslahatlaşyldy. Özara bähbit we dostluk ýörelgelerine esaslanýan hyzmatdaşlygyň pugtalandyrylmagynda dialogyň möhüm roly bellenildi.
Marokkonyň Wekiller palatasynyň başlygynyň orunbasary Ghaýata Mohammed bilen bolan duşuşykda bolsa, iki ýurduň syýasy-diplomatik gatnaşyklaryna seredildi. Parlament agzalary parlament işi boýunça maglumat alyşdylar hem-de kanunçykaryjy edaralaryň hyzmatdaşlygynyň parahatçylygy we ynamy pugtalandyrmakdaky ähmiýetini nygtadylar.
