Türkmenistanyň daşary işler ministri Raşid Meredow Birleşen Milletler Guramasynyň Daşky gurşaw boýunça maksatnamasynyň (UNEP) Ýerine ýetiriji direktory Inger Andersen bilen onlaýn duşuşygy geçirdi. Bu barada Türkmenistanyň Aragatnaşyk ministrliginiň metbugat gullugy habar berdi.
Gepleşikleriň esasy mowzugy — Merkezi Aziýa ýurtlary üçin Howa tehnologiýalary boýunça sebit merkezini döretmek. Bu merkez Aşgabat şäherinde ýerleşer. Taraplar global ekologik kynçylyklar bilen göreşmekde bilelikdäki tagallalaryň zerurdygyny bellediler.
Şeýle hem Türkmenistan tarapyndan BMG-niň Howanyň üýtgemegi baradaky Çarçuwaly konwensiýasynyň Taraplarynyň 28-nji maslahatynyň dowamynda goşulan Metan boýunça ählumumy borçnama boýunça degişli çäreleriň durmuşa geçirilmegi ara alnyp maslahatlaşyldy. Gepleşikde metan zyňyndylaryny yzygiderli hasaba almak üçin MARS ulgamynyň üsti bilen täze maglumatlary bermek mehanizmini döretmäge gönükdirilen, Metan zyňyndylarynyň halkara gözegçilik merkezi bilen bilelikdäki taslamanyň başlandygy bellenildi.
Taraplar şeýle hem Türkmenistanyň Prezidentiniň BMG-niň Baş Assambleýasynyň 78-nji sessiýasynda öňe süren başlangyjyna laýyklykda, Hazar ekologiýa başlangyjyny ösdürmek boýunça hyzmatdaşlygy giňeltmegiň mümkinçiliklerine aýratyn üns berdiler.
Gepleşikleriň ahyrynda Inger Andersen noýabr aýynda geçirilmegi meýilleşdirilýän Howanyň üýtgemegi şertlerinde azyk howpsuzlygy boýunça sebitleýin maslahata gatnaşmak baradaky çakylyk üçin türkmen tarapyna minnetdarlyk bildirdi.
