Azerbaýjanyň Prezidenti Ilham Aliýew Türkmenistanyň Halk Maslahatynyň Başlygy Gurbanguly Berdimuhamedowy sapar bilen Azerbaýjana gelmäge çagyrdy. Bu barada azerbaýjan Lideriniň türkmen halkynyň Milli Liderine iberen hatynda aýdylýar.
"Siziň bilen bolan duşuşyklarymyzy, söhbetdeşliklerimizi hemişe ýakymly duýgular bilen ýatlaýaryn. Ynanyşykly dialogymyzy dowam etdirmek, şeýle hem ikitaraplaýyn hyzmatdaşlygy mundan beýläk-de ösdürmegiň mümkinçilikleri barada pikir alyşmak maksady bilen, Sizi sapar bilen Azerbaýjana gelmäge çagyrýaryn. Bu saparyňyzyň ýurtlarymyzyň arasyndaky gatnaşyklary mundan beýläk-de ösdürmäge, hyzmatdaşlygymyzy pugtalandyrmaga ýardam etjekdigine ynanýaryn" diýip, Ilham Aliýew hatynda belleýär.
Azerbaýjanyň Prezidenti hatynda "iň ýakyn wagtda görüşmek umydy bilen, türkmen halkynyň Milli Liderine berk jan saglyk, bagtyýarlyk, işlerinde üstünlik, Türkmenistanyň doganlyk halkyna bolsa parahatçylyk we abadançylyk arzuw etdi".
