Instagram, TikTok-yň amerikan programma dükanlaryndaky ýoklugyndan peýdalanyp, Reels formatdaky wideolary öz platformasynda paýlaşmak şerti bilen blogerlere uly möçberde pul serişdelerini hödüräp, wideo döredijileri öz tarapyna çekmäge synanyşýar. Awtorlara wideolaryny başga platformalarda, mysal üçin TikTok-da neşir etmezden ozal Instagram-da ýerleşdirmek şerti bilen, her aýda 10 müň dollardan 50 müň dollara çenli girdeji gazanmak mümkinçiligi hödürlenýär diýip, The Information neşiri habar berýär.
Meta kompaniýasy ozal hem TikTok bilen bäsleşmek maksady bilen wideolaryň awtorlaryna berilýän tölegleri artdyrypdy, emma bu uzaga çekmändi. 2021-nji ýylda Instagram Reels üçin girdeji gazanmak programmasyny işe girizdi, 2022-nji ýylda awtorlarlardan tölegleriň azaldylandygy barada habarlar gelip başlapdy, 2023-nji ýylda bolsa programma dolulygyna ýatyryldy.
Instagram-yň blogerler üçin girdejileri artdyrandygy baradaky habarlar TikTok üçin dartgynly döwre gabat geldi. Gadagan edilmegi bilen baglanyşykly wagtlaýyn arakesmeden soň TikTok, geçen ýekşenbe güni ABŞ-da täzeden elýeterli boldy. ABŞ-nyň täze prezidenti Donald Trampyň gol çeken ilkinji resminamalarynyň biri – TikTok-yň ABŞ-da ýene 75 gün işlemegine ygtyýar berýän perman bolupdy.
Ýatlatsak, Instagram ýakyn wagtda profilleriň gözenekleriniň formatyny dörtburçdan göniburçluga üýtgetmek we Reels wideolarynyň dowamlylygyny 3 minuda çenli artdyrmak ýaly täzelikleri yglan edipdi. Şeýle-de Instagram-yň ýolbaşçysy Adam Mosseri, CapCut programmasyna bäsdeş boljak, dik wideolary redaktirlemek üçin “Edits” atly täze programmany köpçülige hödürlejekdiklerini mälim edipdi.
