ABŞ-nyň Prezidenti Donald Tramp wezipä girişen ilkinji güni permana gol çekip, Adalat ministrligine TikTok bilen hyzmatdaşlyk edýän amerikan kompaniýalaryna wagtlaýyn jerime salmazlygy buýurdy.
Bu buýruk TikTok-y ByteDance hytaý kompaniýasyndan aýyrmak ýa-da programmany ABŞ-da ulanmagy gadagan etmek talabyny wagtlaýyn togtadýar. Adalat ministrligine meseläni gözden geçirmek we indiki ädimleri kesgitlemek üçin 75 gün berilýär.
Bu perman TikTok-yň gadagan etmek howpy bolmazdan ABŞ-da işlemegini dowam etdirip biljek möhletini uzaldýar. Adalat ministrligine wideoplatforma elýeterlilik berýän Apple we Google ýaly kompaniýalara garşy sanksiýa ulanmazlyk tabşyryldy.
Permana gol çekilenden soň 75 günüň dowamynda kanunyň bozulandygy üçin jerime salynmaz. Ýöne perman ABŞ-nyň Kongresi tarapyndan kabul edilen we Ýokary kazyýeti tarapyndan goldanan kanunyň özüni üýtgetmeýär.
Tramp TikTok bilen hyzmatdaşlyk etmegi dowam etdirýän kompaniýalar üçin uly jerimeleri göz öňünde tutýan täze kanuna eýermezlige synanyşýar. Bu kanun 2025-nji ýylyň 19-njy ýanwarynda güýje girdi.
Şeýle-de, Tramp ABŞ-nyň hökümetiniň hususy kompaniýa bilen kesgitlenmedik “bilelikdäki taslama” arkaly TikTok-yň paýnamalarynyň 50%-ini satyn almagy meýilleşdirýändigini aýtdy, ýöne bu şertnama barada giňişleýin maglumat ýok.
