Instagram rilsleriň (gysga wideolaryň) aňrybaş dowamlylygyny üç minuda çenli artdyrdy diýip, The Verge ýazýar.
Instagram-yň ýolbaşçysy Adam Mosseri 90 sekundyň “gaty az” bolýandygyndan zeýrenýän ulanyjylaryň muny haýyş edendigini aýtdy. Şol bir wagtyň özünde, ol 2024-nji ýylyň iýulynda “platformanyň esasy wezipesine - adamlary dostlary bilen baglanyşdyrmaklyga” howp salmazlyk üçin, platformanyň rilsleri uzaltmajakdygyny aýdypdy.
The Verge bu täzeligiň ABŞ-da TikTok-yň petiklenmegi bilen baglanyşykly bolup biljekdigini belleýär (petiklenme platforma ABŞ-nyň saýlanan prezidenti Donald Trampyň razylygyny alyp işe başlaýança, bir gün töweregi dowam etdi). Hytaýyň sosial ulgamy ulanyjylara 2021-nji ýylda üç minutlyk wideo goýmaga mümkinçilik beripdi.
Instagram 2022-nji ýylyň ortalarynda rilsleriň uzynlygyny bir ýarym minuta çenli artdyrypdy. Şeýle hem kompaniýa 10 minutlyk rilsleri hem synagdan geçirip görüpdi, ýöne ony iş ýüzünde ornaşdyrmady. 10 minutdan uzak wideony gysga wideo formatynda däl-de, aýratyn post hökmünde öz profiliňize ýükläp alyp bilersiňiz.
Täzelikde Instagram profildäki neşirleriň toruny täzeledi. Indi adaty inedördül nyşanlaryň ýerine gönüburçly şekiller görkezilýär. Täze dizaýny her kim bir hili kabul etdi, esasanam suratlary inedördül formata laýyklaşdyrýan dizaýnerlerdir blogçylaryň pikirleri dürli boldy, sebäbi indi tutuş gözenek “gidipdi”.
