ABŞ-nyň hökümeti we TikTok sosial ulgamynyň ýolbaşçylygy kämillik ýaşyna ýetmedik ulanyjylaryň gizlinliginiň bozulmagy bilen bagly giň gerimli derňew işi boýunça ylalaşyk baglaşmaga golaýlaşýarlar. Tölenjek öwez töleginiň mukdarynyň takmynan 400 million dollar bolmagyna garaşylýar.
Bu jerime, ABŞ-nyň Ýustisiýa ministrliginiň 13 ýaşyna ýetmedik çagalaryň şahsy maglumatlaryny işläp taýýarlamak usullaryna bildiren närazlyklary sebäpli, platformanyň taryhyndaky iň uly jerimeleriň biri bolar.
Gözegçilik ediji edaralaryň 2024-nji ýyldaky arzalarynda görkezilen esasy närzaçylyklary, çagalaryň hyzmata päsgelçiliksiz girmegi we ene-atalarynyň razylygy bolmazdan olaryň şahsy maglumatlarynyň ulgamlaýyn ýygnalmagy bilen baglydyr.
Derňewiň netijelerine görä, ByteDance kompaniýasy içerki howpsuzlyk protokollaryna bilkastlaýyn üns bermändir, bu bolsa federal kanunçylygyň köpçülikleýin bozulmagyna getiripdir. Şeýle-de, ministrlik platformada moderatorlyk we ýaşy tassyklaýyş mehanizmleriniň netijeliliginiň pesdigini aýdyp geçdi.
Ylalaşygyň geň tarapy bolsa, jerime serişdeleriniň nirede ulanyljakdygy baradaky çekişmeler boldy. Ak tam kiberhowpsuzlyk boýunça bilim maksatnamalaryny maliýeleşdirmek ýaly adaty çemeleşmäniň deregine, bu serişdeleri şäher gurluşygyna gönükdirmek mümkinçiligine seredýär. Hususan-da, Donald Tramp tarapyndan teklip edilen, Waşingtonda beýikligi 76 metr bolan dabaraly derwezäni gurmak taslamasy ara alnyp maslahatlaşylýar.
Bu ylalaşyk ABŞ-da daşary ýurt tehnologiýa agirtlerine gözegçiligi güýçlendirmekde möhüm başlangyç bolar.
