Meta kompaniýasy tarapyndan görlen berk çäreler Kriştianu Ronaldu, Lionel Messi we Kilian Mbappe ýaly futbol ýyldyzlarynyň sosial ulgamlarda esli agzasyny ýitirmegine getirdi.
«Speedline» neşiriniň berýän maglumatyna görä, Meta platformany arassalamak maksady bilen işjeň däl akkauntlary, spam-akkauntlary we botlary bozup aýyrmak boýunça uly kampaniýa geçirýär. Bu çäre kontent babatda syýasaty güýçlendirmek, hakyky akkauntlara bolan ynamy ýokarlandyrmak we Instagram-da emeli usul bilen işjeňligi artdyrmak tejribesine garşy durmak meýilnamasynyň bir bölegi hökmünde görülýär.
Şeýle çäräniň netijesinde, esasan, Ronaldunyň agzalary azaldy. Hasaplamalara görä, arassalaýyş işlerinden soň portugaliýaly ýyldyz, takmynan, 18 million agzasyny ýitirdi. Muňa garamazdan, Ronaldu henizem 664 million agzasy bilen dünýä boýunça Instagram-da iň meşhur adam bolmagynda galýar.
Şol bir wagtyň özünde, Messi hem 10 milliona golaý agzasyny ýitirdi. 2022-nji ýylyň dünýä çempionynyň Instagram hasabynda ozal 515 million adam bardy, barlaglardan soň bolsa bu san, takmynan, 505 milliona düşdi.
Bu ýagdaý Mbappeden hem sowa geçmedi, ýöne onuň ýitgisi beýlekiler bilen deňeşdirilende az boldy. «Real Madridiň» hüjümçisiniň 840 000-e golaý agzasyny ýitirendigi habar berilýär.
Hünärmenler bu ýagdaýyň futbol ýyldyzlarynyň meşhurlygyny ýitirýändigini aňlatmaýandygyny belleýär. Çünki, ýiten agzalaryň agramly bölegi galp ýa-da işjeň däl akkauntlardyr.
