Meta kompaniýasy dik wideo redaktirlemek üçin, TikTok-yň “CapCut” programmasyna bäsdeş “Edits” atly täze programmany köpçülige hödürleýär. Instagram-yň ýolbaşçysy Adam Mosseri, Threads platformasyndaky resmi hasabyndan programmanyň iOS wersiýasynyň indiki aýda çykjakdygyny, Android üçin bolsa biraz soň taýýar boljakdygyny mälim etdi. App Store-da bolsa programmanyň işe giriziljek senesi 13-nji mart diýlip görkezilýär. Bu barada TechCrunch habar berýär.
Mosseri programmada döredijilik bilen bagly gurallaryň bardygyny, şol sanda ylham almak, pikir gözlemek üçin bölümleriň, meşhur aýdymlardan ybarat sanawlaryň we kameranyň boljakdygyny aýtdy. Mundan başga-da, Edits ulanyjylara taslamalary döretmek we olary dostlary ýa-da hyzmatdaşlary bilen paýlaşmak ýaly mümkinçilikleri hödürlär.
Bu programma bilen 10 minuda çenli wideolary düşürip bolýar, Instagram-a ýüklenjek wideolaryň hili bolsa 1080p bolar. Şeýle hem mazmun döredijiler programmada wideolarynyň statistikasyny we ulanyjylaryň gyzyklanma görkezijilerini görüp bilerler.
Instagram Edits-iň köpçülige hödürlenjekdigini, ABŞ-da TikTok we CapCut programmalarynyň wagtlaýyn petiklenen güni mälim etdi. Emma bu gadaganlyk bary-ýogy bir gün dowam etdi. ABŞ-nyň saýlanan prezidenti Donald Tramp, TikTok-y gaýtadan açjakdygyny aýdandan soň, programma amerikan ulanyjylaryna ýene elýeterli boldy.
