Beýik Britaniýanyň Kil uniwersitetiniň alymlary galp habarlary anyklamak üçin “ansambl ses beriş” tehnikasyna esaslanýan guraly döretdi. Ulgam ygtybarly däl maglumaty 99% takyklyk bilen kesgitleýär. Bu oýlap tapyş internetde ygtybarsyz maglumatlaryň ýaýramagyna garşy göreşde esasy çözgüt bolup biler.
Taslamanyň netijeleri Kembrijde geçirilen emeli aň boýunça 44-nji Halkara maslahatynda hödürlendi.
Galp habarlar bilen göreşmegiň täze usuly birnäçe maşyn bilimi modeliniň çaklamalaryny birleşdirip, habar mazmunynyň ygtybarlylygyna dogry baha bermäge mümkinçilik berýär.
Bu guralyň işlenip taýýarlanmagyna kiberhowpsuzlyk mugallymy, doktor Uçenna Ani ýolbaşçylyk etdi.
“Häzirki hemişe üýtgäp durýan sanly aragatnaşyk şertlerinde nädogry maglumatlaryň giňden ýaýramagy çynlakaý alada döredýär. Bu hadysa jemgyýetçilik sözleýşiniň bitewiligini bozup, esassyz garaýyşlary we hereketleri döretmek arkaly ýerli hem milli howpsuzlyga zyýan ýetirip biler” – diýip, hünärmen belleýär.
Ylmy gözlegçiler ulgamy kämilleşdirip, emeli aň tehnologiýalarynyň ösmegini göz öňünde tutmak bilen, 100% takyklygy gazanmagy meýilleşdirýär.
