ABŞ-nyň Milli aeronawtika we kosmos giňişliginiň barlaglary müdirligi (NASA) Dragonfly (“Teneçir”) apparatyny uçurmak üçin SpaceX kompaniýasy bilen 257 million dollarlyk şertnama baglaşdy. Missiýanyň çäklerinde Saturnyň hemrasy Titanyň ýaşaýyşa ýaramlylygyny anyklamak üçin barlag geçiriler.
Aşa agyr Falcon Heavy göteriji raketada uçurmaklyk 2028-nji ýylyň iýul aýyna meýilleşdirilýär.
450 kg-lyk wint ganatly dron bolan Dragonfly 2034-nji ýylda Titana barar. Onuň wezipeleri hemranyň atmosferasyny, topografiýasyny we uglewodorod suw howdanlaryny öwrenmek, şeýle hem çylşyrymly organiki molekulalary gözlemekden ybarat. Çen bilen düşmeli ýeri - uglewodorod bölejiklerinden ybarat çukurlary bolan Şangri-La sebitidir.
Missiýa NASA-nyň New Frontiers (“Täze sepgitler”) maksatnamasynyň bir bölegi bolar. Taslamanyň umumy býujeti, enjamyň tehniki taýdan gowulaşdyrylmagy we pandemiýa bilen bagly gijä galmagy sebäpli, 3,35 milliard dollar diýlip hasaplanylýar.
Titan Ýeriň irki döwrüne meňzeşligi sebäpli alymlary gyzyklandyrýar. Hemranyň dykyz atmosferasy we suwuk uglewodorod kölleri bar. Alymlar Dragonfly-yň ýaşaýyşyň döremeginden öňki proseslere düşünmäge kömek eder diýip umyt edýärler.
Bu Ýewropa kosmos gullugynyň 2005-nji ýylda hemranyň üstüne üstünlikli gonan Gýugens zondundan soň, Titana baran ikinji apparat bolar.
