Kertin uniwersitetiniň we Günbatar Awstraliýanyň Geologik gullugynyň alymlary Ýerde mälim bolan iň gadymy krateriň ýaşynyň, takmynan, 3 milliard ýyla deňdigi baradaky netijä geldi. Bu ylmy işiň netijeleri «Geology» žurnalynda neşir edildi.
Krater Awstraliýanyň demirgazyk-günbatar bölegindäki Pilbara sebitinde ýerleşýär. Ol 2025-nji ýylda ýüze çykarylypdy. Bu obýektiň diametri 40 kilometrden 45 kilometre ýetýär. Ol arheý erasynyň başynda diametri birnäçe ýüz metr bolan iri asteroidiň gaçmagy netijesinde emele gelipdir.
Mundan ozal krateriň ýaşy jedelli mesele bolup galypdy. Käbir çaklamalar onuň ýaşyny 3,47 milliard ýyl diýip görkezse, başga bir baha bermeler 2,3–2,4 milliard ýyl aralygyny görkezýärdi.
Geçirilen barlagyň barşynda alymlar krateriň çäginde tapylan sirkon kristallaryny öwrendi. Seljermeler minerallaryň bir böleginiň asteroidiň zarbasy zerarly dörän gaty güýçli gyzgynlygyň täsirine düşendigini görkezdi. Bu emele gelmeleriň ýaşy, takmynan, 3 milliard ýyla deň boldy.
Alnan maglumatlar gyzgyn suwuklyklaryň zeper ýeten dag jynslarynyň üsti bilen hereket etmegi netijesinde emele gelen mineralyň – apatitiň seljermesi arkaly tassyklandy. Bu görkezijiler hem krateriň ýaşynyň, takmynan, 3 milliard ýyldygyny görkezdi.
