«Jeýms Webb» kosmos teleskopy Ýerden, takmynan, 57 ýagtylyk ýyly uzaklygynda ýerleşýän «GJ504b» ekzoplanetasynyň geň galdyryjy gülgüne reňke eýe bolmagynyň sebäbini anyklamaga kömek etdi.
Barlagçylar ilkinji gezek planetanyň jikme-jik spektroskopik maglumatlaryny alyp, onuň atmosferasynda suw bugunyň, metanyň, kömürturşy gazynyň we ammiagyň bardygyny anyklady. Ýöne planetanyň özboluşly reňki onuň himiki düzümi bilen däl-de, bugaran duz bölejiklerinden emele gelen bulutlar bilen düşündirilýär.
Alymlaryň berýän maglumatlaryna görä, duz bulutlary ýagtylygy dargatmak we spektral signallary üýtgetmek arkaly özüne mahsus bolan gülgüne öwüşgini döredýär. Bu açyş ekzoplanetalary öwrenmekde atmosferanyň gurluşynyň örän uly orun eýeleýändigini we onuň gözegçilikleriň netijelerine düýpli täsir edip biljekdigini görkezdi.
«GJ504b» planetasy gaz ägirtleri bilen goňur girdenek (kiçi) planetalaryň aralygyndaky kategoriýada ýerleşýär. Onuň massasy Ýupiteriňkiden, takmynan, 25 esse uly, gyzgynlygy bolsa Selsiý boýunça 288 gradus töweregidir, bu bolsa göni synlanýan beýleki köp sanly ekzoplanetalaryň gyzgynlyk derejesinden ep-esli pesdir. Barlagçylaryň çykaran netijelerine görä, bu asman jisiminiň ýaşy 2,5 milliarddan 4 milliard ýyla çenli bolmaly.
