Ýagşygeldi Kakaýew adyndaky Halkara nebit we gaz uniwersitetinde «Himiýa we gazhimiýa innowasion tehnologiýalaryň geljegi» atly sanly ulgam arkaly halkara ylmy-amaly maslahat geçirildi. Bu barada "Türkmenistan: Altyn asyr" elektron neşiri habar berdi.
Maslahata dünýäniň 18 döwletinden, şol sanda Russiýadan, Hytaýdan, Germaniýadan we Beýik Britaniýadan 34 ýokary okuw mekdebiniň wekilleri gatnaşdylar. Petronas Charigali, Dragon Oil, CNPC we beýleki iri kompaniýalaryň wekilleri hem maslahata gatnaşdylar.
Maslahaty HNGU-nyň rektory B.Atamanow açdy. Maslahatyň gün tertibine umumy mejlis we himiýa senagatyna, gazhimiýadaky innowasiýalara we pudagyň ekologiýa meselelerine bagyşlanan üç sany mowzuklaýyn sessiýa girdi. 90-dan gowrak ylmy çykyşlar diňlenildi.
Maslahata gatnaşyjylar innowasion tehnologiýalary ornaşdyrmaklygy, prosesleri sanlylaşdyrmaklygy we gazhimiýa senagatynyň ykdysadyýetiň ösüşine täsirini maslahatlaşdylar.
