Garyşyk başa-baş söweş sungatynyň ermeni-rus söweşijisi Arman Sarukýan Dohada (Katar) geçirilen UFC Fight Night 265 ýaryşynyň esasy söweşinde Täze Zelandiýanyň wekili Den Hukerden üstün çykdy.
Bäş raund dowam etmeli söweş möhletinden ir tamamlandy. Ikinji raundda Sarukýan garşydaşyny partere geçirdi we “el üçburçlugy” demikdiriji usulyny ulanyp, ony boýun egmäge mejbur etdi.
Söweşden soň Ermenistanyň wekili ýeňil agramda (70,3 kg çenli) häzirki çempion Iliýa Topuriýany söweşe çagyrdy. Sarukýan indiki ýylyň ýanwar aýynyň ahyrynda gruzin-ispan türgeni bilen titul söweşini geçirmäge taýýardygyny aýtdy.
2025-nji ýylyň ýanwarynda Sarukýanyň guşagy almak mümkinçiligi bolupdy, ýöne arka şikesi sebäpli ýaryşdan bir gün öň Islam Mahaçewe garşy söweşden çekildi. Russiýaly söweşiji şol wagt tituly gorady, şondan soň ýarym orta diwiziona geçmek üçin ony boşatdy. Ol bu diwizionda-da çempion boldy. Topuriýa bolsa braziliýaly Çarlz Oliweýrany ýeňenden soň, ýeňil agramda erkin guşagy aldy.
29 ýaşly Sarukýan amerikan promouşeninde yzygider bäşinji ýeňşini gazandy. Bu onuň 2024-nji ýylyň aprelinden bäri ilkinji söweşi boldy. Şol wagt ol Las-Wegasda geçirilen şanly UFC 300 ýaryşynda Oliweýrany ýeňipdi.
Indi Sarukýanyň hasabynda 23 ýeňiş we üç ýeňliş bar. Dohadaky ýaryşdan öň ol UFC-niň ýeňil diwizionynyň reýtinginde birinji orny eýeleýärdi. Altynjy orny eýeleýän 35 ýaşly Huker karýerasynda 13-nji gezek ýeňildi, şeýle-de onuň 24 ýeňşi bar.
