Prezident Serdar Berdimuhamedow we Halk Maslahatynyň Başlygy Gurbanguly Berdimuhamedow Türkmenistanyň halkynyň we Hökümetiniň adyndan Hytaý Halk Respublikasynyň Başlygy Si Szinpine we Döwlet Geňeşiniň Premýeri Li Sýana hem-de ýurduň dostlukly halkyna Hytaý Halk Respublikasynyň jar edilen güni mynasybetli gutlaglaryny iberdiler. Gutlaglar resmi metbugatda çap edildi.
Döwlet Baştutany gutlagynda Hytaý Halk Respublikasynyň häzirki döwürde öňegidişlik we gülläp ösüş ýoly bilen durmuşyň ähli ugurlarynda ynamly öňe barýandygyny, bu şanly baýramy durmuş-ykdysady ösüşdäki, halkyň hal-ýagdaýyny gowulandyrmakdaky, halkara giňişlikde abraýyny berkitmekdäki uly üstünlikler bilen garşylaýandygyny belledi. Türkmenistanyň Prezidenti soňky ýyllarda ýurtlarymyzyň arasyndaky uzak möhletleýin we strategik häsiýetli gatnaşyklaryň düýpli işjeňleşdirilendigini, täze mazmun bilen baýlaşdyrylandygyny nygtap, Türkmenistan bilen Hytaý Halk Respublikasynyň arasyndaky dostluk, hoşniýetli goňşuçylyk gatnaşyklarynyň umumy bähbitler üçin mundan beýläk-de ösdüriljekdigine ynam bildirdi.
Türkmen halkynyň Milli Lideri öz hatynda Türkmenistanyň Hytaý Halk Respublikasy bilen wagtyň synagyndan geçen dostluga esaslanýan ikitaraplaýyn gatnaşyklaryň berkidilmegine möhüm ähmiýet berýändigini, döwletara dialoga mahsus bolan birek-birege ynanyşmagyň, açyklygyň ýokary derejesiniň özara bähbitli hyzmatdaşlygy ösdürmegiň wajyp şertidigini belledi. Şeýle-de türkmen halkynyň Milli Lideri ikitaraplaýyn gatnaşyklary hil taýdan täze derejä çykarmak üçin bilelikde tagalla etmäge taýýardygyny beýan etdi.
