Dünýä türkmenleriniň ynsanperwer birleşiginiň daşary ýurt bölümi bolan Täjigistanly türkmenleriň jemgyýetiniň ýolbaşçysy M.Gaýypnazarow Türkmenistanyň Prezidenti Serdar Berdimuhamedowa we Halk Maslahatynyň Başlygy Gurbanguly Berdimuhamedowa hoşallyk hatyny iberdi.
Hatda Täjigistan Respublikasynyň Hatlon welaýatynyň Dusti etrabynyň Ergeş Sultanow daýhan birleşiginde beýik türkmen şahyry we akyldary Magtymguly Pyragynyň adyny göterýän 540 orunlyk umumybilim berýän orta mekdebiň binasyny gurduryp berendigi üçin Türkmenistanyň ýolbaşçylaryna Täjigistanda ýaşaýan türkmenleriň adyndan hoşallyk bildirilýär.
"Täze okuw ýylynda 1-nji synpa gadam basan okuwçylara Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan noutbuk kompýuterleriniň gowşurylmagy, mekdebe ýörite awtobusyň sowgat berilmegi bizde ýokary watançylyk duýgusyny döredip, ata Watanymyz Türkmenistana bolan buýsanjymyzy has-da belende göterdi" diýlip, resmi metbugatda çap edilen hatda aýdylýar.
Hatda Täjigistanda ýaşaýan türkmenler Türkmenistanyň Prezidentini, Halk Maslahatynyň Başlygyny, türkmen halkyny Türkmenistanyň Garaşsyzlygynyň 33 ýyllygy bilen gutlaýarlar.
